काठमाडौं, असोज ३ — पुँजीबजारमा देखा परेको अस्थिरता र समस्याहरू समाधान गर्न अर्थ मन्त्रालयले चार सदस्यीय कार्यदल गठन गरेको छ। यो कदम बजारमा उत्पन्न विसंगति अध्ययन गरी लगानीकर्ताको विश्वास र मनोबल बढाउने उद्देश्यले उठाइएको हो। कार्यदलले प्रणालीगत सुधारका सुझाव र ठोस कार्यान्वयन योजना तयार पार्नेछ।
कार्यदलको संयोजक धितोपत्र बोर्डका कायममुकायम कार्यकारी निर्देशक रुपेश केसी रहेका छन्। सदस्यहरूमा नेपाल राष्ट्र बैंकका निर्देशक शरण अधिकारी, नेपाल स्टक एक्सचेन्जका कायममुकायम कार्यकारी निर्देशक निरञ्जन भट्टराई छन् भने सदस्य–सचिवको जिम्मेवारी अर्थ मन्त्रालयका उपसचिव शरद निरौला सम्हाल्नेछन्।
अर्थ मन्त्रालयका प्रवक्ता टङ्कप्रसाद पाण्डेयका अनुसार, कार्यदलले पुँजीबजारमा देखिएका समस्याको विश्लेषण गरी तत्काल लागु गर्न सकिने सुधारात्मक कदम र रोडम्याप तयार पार्नेछ। यस पहलबाट लगानीकर्ताको मनोबल बढाउने र पुँजीबजारमा पारदर्शिता र स्थायित्व सुनिश्चित गर्ने अपेक्षा गरिएको छ।
