काठमाडौं, जेठ २४ – पूर्व राष्ट्रपति विद्यादेवी भण्डारीले समृद्ध नेपाल र सुखी नेपालीको राष्ट्रिय लक्ष्य प्राप्तिका लागि विज्ञान र प्रविधिको प्रयोग अनिवार्य रहेको बताएकी छन्। झापाको बिर्तामोडमा नेकपा एमाले कोशी प्रदेश कमिटीको विज्ञान तथा प्रविधि विभागले आयोजना गरेको तीन दिने प्रदेशस्तरीय विज्ञान प्रदर्शनीको उद्घाटन गर्दै उनले विद्यार्थीहरूलाई वैज्ञानिक सोच, अनुसन्धानमूलक दृष्टिकोण र नवप्रवर्तनशील क्षमता विकास गराउन सरकारको भूमिका महत्वपूर्ण रहेको औँल्याइन्।
भण्डारीले विज्ञानलाई केवल प्रयोगशालामा सीमित नराखी मानिसको सोच र चिन्तनलाई सही निष्कर्षमा पुर्याउने प्रभावकारी प्रक्रिया भएको बताइन्। उनले राज्यले विज्ञान, प्रविधि र गणित शिक्षामा विशेष प्राथमिकता दिनुपर्ने र यस क्षेत्रमा विज्ञ तथा विशेषज्ञहरूको ज्ञान र अनुभवको सदुपयोग गर्न आवश्यक रहेको बताइन्।
पूर्व राष्ट्रपतिले नेपालमा उपलब्ध प्राकृतिक स्रोतहरूको दिगो र अधिकतम प्रयोग गरी स्वदेशी उत्पादन र उत्पादकत्वमा वृद्धि गर्नुपर्नेमा जोड दिँदै यसले व्यापक रोजगारी सिर्जना गरी आत्मनिर्भर र सुदृढ अर्थतन्त्र निर्माणमा मद्दत गर्ने बताइन्। उनले विद्यालयदेखि उच्च शिक्षासम्मका शैक्षिक संस्थाहरूमा पर्याप्त स्रोतसाधन, दक्ष शिक्षक र प्राविधिक जनशक्तिको व्यवस्था गर्नु राज्यको दायित्व भएको पनि उल्लेख गरिन्।
यसरी भण्डारीले विज्ञान र प्रविधिको माध्यमबाट देशलाई आर्थिक रूपमा समृद्ध र विकसित बनाउने मार्गमा सबै पक्षको सक्रिय सहभागिताको आवश्यक्ता औँल्याएकी छन्।
