काठमाडौं — अभिनेता आमिर खान अभिनीत फिल्म ‘सितारे जमिन पर’ले बक्स अफिसमा १०८ करोड रुपैयाँभन्दा बढी आम्दानी गरेको छ। यो फिल्मले आमिर खानको ‘लाल सिंह चड्डा’ पछि लामो समयपछि गरिएको सफल कमब्याकको रूपमा देखिएको छ।
जुन २० मा रिलिज भएको ‘सितारे जमिन पर’ले पहिलो दिनमै १०.७ करोड रुपैयाँको व्यापार गरेको थियो र त्यसपछि यसको कमाइ निरन्तर बढ्दै गएको छ। पहिलो सातामा फिल्मले ८८.९ करोड रुपैयाँ कमाइसकेको थियो भने शुक्रबार ६.६५ करोड र शनिबार १२.७५ करोड रुपैयाँको कारोबार भएको छ। सार्वजनिक बिदा परेको आइतबार पनि फिल्मको व्यापार राम्रो हुने अपेक्षा गरिएको छ।
फिल्मको निर्देशन आर एस प्रसन्नाले गरेका हुन् भने आमिर खानसँगै जेनेलिया देशमुख मुख्य भूमिकामा देखिएकी छन्। ‘सितारे जमिन पर’ले बक्स अफिसमा नयाँ उचाइ छुने क्रममा आमिर खानको फिल्मी यात्रामा नयाँ आशा थपेको छ।
