काठमाडौं, असोज ७ — कञ्चनपुरको भीमदत्त नगरपालिका–९ खल्ला मसेट्टी क्षेत्रमा स्वास्थ्य संस्थाको अभावका कारण गर्भवती महिलाहरू घरमै सुत्केरी हुन बाध्य छन्। नजिकै ब्रह्मदेवमा बर्थिङ सेन्टर भए पनि त्यहाँ पुग्न करिब आठ किलोमिटरको जोखिमपूर्ण कच्ची बाटो पार गर्नुपर्छ, जसका कारण महिलाहरूले दुई घण्टा पैदल यात्रा गर्नुपर्ने अवस्था छ।
स्थानीय स्वास्थ्य स्वयंसेविका विमला बमका अनुसार कतिपय गर्भवती बाटोमै सुत्केरी हुनुपर्ने स्थिति सिर्जना भएको छ। यहाँ सरकारले सुत्केरी स्वास्थ्य संस्थामा गराउने कार्यक्रम चलाइरहे पनि भौतिक पहुँच नहुँदा लागू हुन सकेको छैन। पैदल वा स्टेचरमा बोकेर स्वास्थ्य संस्थामा लैजानुपर्ने बाध्यता अझ गाह्रो बनाएको छ।
गाउँघर क्लिनिकमा सुत्केरी जाँच, खोप र भिटामिन जस्ता आधारभूत स्वास्थ्य सेवा कमजोर भएको छ। अनमीको अनुपस्थितिले सेवामा अवरोध आएको छ। स्थानीय रेखा विकका अनुसार नियमित चेकजाँचका लागि समेत महिलाले दुई घण्टा पैदल यात्रा गर्नुपर्छ।
स्थानीयहरूले घर नजिकै बर्थिङ सेन्टर स्थापना गरी सुरक्षित सुत्केरीको अधिकार सुनिश्चित गर्न माग गरेका छन्। बस्तीको आधारभूत सेवा अभाव, कच्ची सडक र स्वास्थ्य जनशक्ति कम हुने कारण यहाँको जनजीवन अत्यन्तै कठिन भएको जनाइएको छ।
