काठमाडौँ, साउन २७ – काठमाडौं महानगरपालिकाले खेल क्षेत्रमा उत्कृष्ट प्रदर्शन गर्ने दुई पक्षलाई विशेष सम्मान गरेको छ। म्याट्रिक्स फाइट नाइट १७ (एमएफएन १७) का बान्टमवेट च्याम्पियन नेपाली एमएमए फाइटर रवीन्द्र ढाटलाई २ लाख रुपैयाँ प्रदान गरिएको छ।
साथै, पहिलो खोखो विश्वकप २०२५ मा उपविजेता बनेका पुरुष र महिला दुवै टोलीलाई ११–११ लाख रुपैयाँका दरले गरी जम्मा २२ लाख रुपैयाँको चेक हस्तान्तरण गरिएको छ।
खोखो टोलीको पुरस्कार रकम नेपाल खोखो संघमार्फत व्यवस्था हुने जनाइएको छ। सम्मान कार्यक्रममा महानगरका प्रमुख, उपप्रमुख, प्रमुख प्रशासकीय अधिकृत र सामाजिक विकास समितिका संयोजकसहित अन्य अधिकारीहरूको उपस्थिति रहेको थियो। सामाजिक विकास समितिका संयोजक रामकुमार केसीका अनुसार यस्ता उपलब्धिले मुलुकको गौरव बढाएको छ र महानगरले भविष्यमा पनि खेलाडीलाई निरन्तर प्रोत्साहन दिनेछ।
भारतको नोएडामा आयोजित एमएफएन १७ मा बझाङका रवीन्द्र ढाटले चोंगरेंग कोरेनलाई तेस्रो राउन्डमा पराजित गर्दै उपाधि जितेका थिए। यससँगै उनको व्यावसायिक रेकर्ड ८–१ मा पुगेको छ र उनी बान्टमवेट च्याम्पियन बन्ने पहिलो नेपाली बनेका छन्।
खोखोतर्फ, पुरुष टोलीले नयाँ दिल्लीमा भएको फाइनलमा आयोजक भारतसँग ५४–३६ ले हार व्यहोरेको थियो भने महिला टोली ७८–४० ले पराजित भएको थियो। यो विश्वकपको फाइनलसम्म पुग्ने नेपालको कुनै पनि टिमको पहिलो ऐतिहासिक अवसर भएको बताइएको छ। सम्मान ग्रहण गर्दै खेलाडीहरूले यसले आफ्नो आत्मबल र भविष्यका खेल प्रदर्शनमा थप ऊर्जा दिने प्रतिक्रिया दिएका छन्।
