काठमाडौं, २१ जेठ – नेपाली कांग्रेसका सभापति तथा पूर्वप्रधानमन्त्री शेरबहादुर देउवाले जलवायु परिवर्तनका प्रतिकूल असरहरू नेपालमा गम्भीर रूपमा देखिएको बताएका छन्। आज एक कार्यक्रममा बोल्दै उनले नेपाल विश्वभरमा कार्बन उत्सर्जनको मामलामा नगण्य भए पनि असरको दृष्टिले सबैभन्दा संवेदनशील मुलुकमध्ये एक भएको उल्लेख गरे।
सभापति देउवाले हिमालय क्षेत्रका हिउँ पग्लिनु, अस्वाभाविक मौसमी घटनाहरू बढ्नु र प्राकृतिक विपद्को आवृत्ति वृद्धि हुनुजस्ता समस्याहरू जलवायु परिवर्तनको स्पष्ट संकेत भएको बताए। उनले यस्ता समस्याको सामना गर्न अन्तर्राष्ट्रिय समुदायबाट सहयोग आवश्यक रहेकोमा जोड दिए।
उनले सन् २०२१ मा संयुक्त अधिराज्यको ग्लास्गोमा आयोजित कोप–२६ जलवायु सम्मेलनमा नेपालको तर्फबाट सन् २०४५ सम्म कार्बन उत्सर्जन शून्यमा पुर्याउने प्रतिबद्धता व्यक्त गरेको स्मरण गरे। सो लक्ष्यलाई प्राप्त गर्न विद्युतीय तथा नवीकरणीय ऊर्जाको प्रयोगमा जोड दिनुपर्ने उनको भनाइ थियो।
कार्यक्रममा सहभागी ‘साथसाथै’ संस्थाकी अध्यक्ष प्रजिता कार्कीले पनि नेपालमा कोइला लगायत जीवाश्म इन्धनको प्रयोग बन्द गरी स्वच्छ ऊर्जामा रूपान्तरण गर्न नीति, योजना र व्यवहारिक पहल आवश्यक रहेको बताइन्।
देउवाले जलवायु परिवर्तनको असर न्यून गर्न र विकासलाई दिगो बनाउने दिशामा सरकार र जनस्तरबाट साझा प्रयास हुनु आवश्यक रहेको औँल्याए।
