काठमाडौं, भदौ २९ — सहरी विकास मन्त्रालयले जेनजी आन्दोलनको क्रममा भएको आगलागी र तोडफोडबाट पुगेको क्षतिको विवरण तीन दिनभित्र तयार पार्ने योजना बनाएको छ। मन्त्रालयका सचिव गोपालप्रसाद सिग्देलको संयोजकत्वमा आज बसेको बैठकले मन्त्रालयभित्रका भौतिक संरचना, कार्यालय उपकरण र गाडीहरूको क्षतिको मूल्याङ्कन गर्ने निर्णय गरेको हो।
मन्त्रालयका प्रवक्ता नारायणप्रसाद मैनालीका अनुसार मन्त्रालयका ५० वटा गाडी पूर्ण रूपमा जलेर नष्ट भएका छन् भने केही गाडीहरू तोडफोड भएका छन्। त्यस्तै, कार्यालयका उपकरण र अन्य सामान चोरी भएका छन्। सहरी विकास तथा भवन निर्माण विभागका भवनहरूमा आगोले करिब ६० प्रतिशत नोक्सानी पुर्याएको बताइएको छ। सचिव सिग्देलले कार्यालय सञ्चालनको लागि अस्थायी योजना बनाउनुपर्ने अवस्था रहेको र तीन दिनभित्र क्षतिको सम्पूर्ण विवरण सङ्कलन गर्ने लक्ष्य राखिएको जानकारी दिए।
मन्त्रालयले जलेका भवन र गाडी तथा उपकरणहरूको क्षतिको मूल्याङ्कन गरेपछि आगामी दिनमा पुनःनिर्माण र सेवा सुचारु गर्न तयारी अघि बढाउनेछ। यसक्रममा मन्त्रालयले कर्मचारी र स्रोत व्यवस्थापनलाई प्राथमिकतामा राख्दै नयाँ कार्य योजना तयार पार्नेछ।
