१ असोज, काठमाडौं । बुटवल हुँदै बग्ने तिनाउ नदीमा बाढीको स्तर बढ्दै गएपछि जल तथा मौसम विज्ञान विभागले आसपासका स्थानीयलाई सतर्क रहन अपील गरेको छ ।
विभागले सोमबार बिहान ७:५० बजे जारी गरेको सूचनामा नदी किनार तथा डुबानमा पर्न सक्ने बस्तीका बासिन्दालाई सतर्क रहन भनिएको छ । नदीमा पानीको बहाव तीव्र गतिमा बढिरहेको र खतरा झनै बढ्न सक्ने भएकाले सतर्कता आवश्यक रहेको विभागको भनाइ छ।
विभागले मोबाइल एसएमएसमार्फत समेत पाल्पा, रुपन्देही र आसपासका जिल्लाका नागरिकलाई जोखिमबारे सचेत गराएको छ । पछिल्ला दिनमा लगातार वर्षा भइरहेको र आइतबार रातिदेखि झनै भारी वर्षा भएकाले बाढीको जोखिम बढेको जनाएको छ।
बाढी बढ्न थालेपछि नदी किनारमा बसोबास गर्ने, खेतीपाती गर्ने र आवतजावत गर्नेहरुलाई विशेष सतर्कता अपनाउन आग्रह गरिएको छ।
