काठमाडौं, साउन ५ — आगामी १२ भदौबाट प्रदर्शनमा आउने नेपाली फिल्म ‘कोशोढुङ्गा’ को पहिलो गीत ‘नत्र भने जिन्दगी व्यर्थ छ’ सोमबार सार्वजनिक गरिएको छ।
गीतको सार्वजनिक कार्यक्रममा खेम सेन्चुरी, समीक्षा अधिकारी र दीपिका मगरले स्वर दिएका छन्। नेत्र अर्यालले लेखेको गीतमा खेम सेन्चुरीले सङ्गीत पनि दिएका छन्। भिडियो तीज पर्वको वातावरणमा तयार पारिएको छ र फिल्मका मुख्य अभिनेत्री ऋचा शर्मा, सुरक्षा पन्त र नीति शाहले भिडियोमा नृत्य गरेका छन्। गीतले अविवाहित र विवाहित महिलाहरूको भावना, अनुभव र अनुभूतिलाई व्यक्त गरेको छ।
फिल्मको निर्देशन सरोज पौडेलले गरेका हुन्, जसले अघि पनि ‘पूर्ण बहादुरको सारङ्गी’ निर्देशन गरिसकेका छन्।
‘कोशोढुङ्गा’ मा ऋचा शर्मा, सुरक्षा पन्त, नीति शाहका अलावा आर्यन सिग्देल, प्रवीण खतिवडा, सरोज खनाल, विशाल पहाडी, लोकमणी सापकोटा, हिउँवाला गौतम, दिनेश काफ्ले, शेखर चापागाईं, सिरु विष्ट र उद्धव सापकोटा लगायतका कलाकारहरूले अभिनय गरेका छन्।
फिल्म नरदेवी फिल्मसको प्रस्तुति हो। बाबु श्रेष्ठले छायांकन गरेका छन् भने नहकुल खड्काले सम्पादन गरेका छन्। कोरियोग्राफी स्मृति तिमल्सेना र सुमन सागर जङ्ग केसीले गरेका हुन्। निर्मातामा प्रेविल कँडेल र किशोर अनुराग छन् भने दिनेश खड्का कार्यकारी निर्माता हुन्।
