काठमाडौं, साउन २ — नेपाली महिला कबड्डी टोली दोस्रो महिला कबड्डी विश्वकप खेल्न भारतको हरियाणा जाने तयारीमा छ। प्रतियोगिता साउन १९ देखि २७ गते (अगस्ट ३–१०) सम्म मोरमाजरामा आयोजना हुँदैछ।
टोलीमा १४ खेलाडी र ४ अफिसियल छन्। कप्तान मानमति विष्ट र उपकप्तान जयन्ती बडु छन्। प्रशिक्षक विष्णुदत्त भट्टले ८ महिनाको बन्द प्रशिक्षणले टोलीको तयारी सशक्त बनेको बताएका छन्। टोलीले प्रतियोगिताअघि मोरमाजरामै १२ दिनको तयारी र ५ वटा स्थानीय क्लबसँग अभ्यास खेल खेल्नेछ।
नेपाल यसपटक एसियाली राष्ट्रहरूबाट विश्व वरीयतामा तेस्रो स्थानमा रहेको टोलीका रूपमा सहभागिता जनाउँदैछ। प्रतियोगितामा नेपालसहित भारत, युगान्डा, जर्मनी, चाइनिज ताइपेइ, नेदरल्यान्ड्स, जन्जिबार, इरान, जापान, पोल्यान्ड, केन्या, अर्जेन्टिना र थाइल्यान्डको टोली सहभागी हुनेछन्।
महिला कबड्डी विश्वकपको दोस्रो संस्करण १३ वर्षपछि हुन लागेको हो। पहिलो संस्करण सन् २०१२ मा पटनामा भएको थियो।
टोलीलाई राष्ट्रिय खेलकुद परिषद्का सदस्य–सचिव टंकलाल घिसिङ, अखिल नेपाल कबड्डी संघकी अध्यक्ष तुलसी थापा र निर्देशक दीपक विष्टले बिदाइ गरेका छन्। प्रशिक्षक र कप्तानले पदक जित्ने लक्ष्यका साथ टोलीले मैदान उत्रिने बताएका छन्।
