काठमाडौं, भदौ ४ — नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ बुधबार साँझ राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेट्न ललितपुरस्थित नख्खु कारागार पुगे।
सहकारी प्रकरणमा पक्राउ परेका लामिछानेलाई केही दिनअघि मात्र भैरहवा कारागारबाट स्वास्थ्य कारण देखाउँदै नख्खु सारिएको हो। रास्वपाले उनको शरीरमा भिटामिन ‘डी’ को कमी देखिएको बताएको छ।
भेटपछि सञ्चारकर्मीहरूसँग संक्षिप्त प्रतिक्रिया दिँदै प्रचण्डले लामिछानेलाई भैरहवामा रहँदा अत्यन्त कमजोर अवस्थामा रहेको तर नख्खु आएपछि केही सुधार भएको देखिएको जानकारी दिए। उनले भने, “उहाँ दुब्लाउनु भएको छ, अनुहारमै कमजोरी प्रस्ट देखिन्छ। तर यहाँ आएपछि अवस्था अलिक सहज भएको सुनाउनुभयो।”
लामिछानेले पनि प्रचण्डसँग नख्खु कारागारको व्यवस्थापनबारे सकारात्मक टिप्पणी गर्दै भैरहवाको तुलनामा यहाँको अवस्था धेरै राम्रो भएको बताएका छन्।
