२२ जेठ, काठमाडौं — नबिल बैंक लिमिटेडको प्रमुख कार्यकारी अधिकृत (सिइओ)मा मनोज कुमार ज्ञवालीलाई नियुक्त गरिएको छ। बैंकको सञ्चालक समितिको ६८२ औं बैठकले उनलाई चार वर्षका लागि सिइओ पदमा नियुक्त गरेको हो। ज्ञवाली यसअघि कायममुकायम सिइओको रूपमा कार्यरत थिए र बैंकिङ क्षेत्रमा उनी एक स्पष्ट वक्ता र अनुभवी नेतृत्वकर्ता मानिन्छन्।
उनले नेपाल राष्ट्र बैंक र विभिन्न वाणिज्य बैंकहरूमा व्यवस्थापन तहमा नेतृत्वदायी भूमिका निर्वाह गर्दै २६ वर्षभन्दा बढी अनुभव सङ्कलन गरेका छन्। ज्ञवालीसँग बैंकिङ तथा पुँजी बजार क्षेत्रको गहिरो ज्ञान छ र उनको नेतृत्वमा नबिल बैंकले आगामी दिनमा वित्तीय सूचकाङ्कहरूमा अग्रणी स्थान हासिल गर्ने अपेक्षा गरिएको छ।
त्यसैगरी, सञ्चालक समितिले आदर्श बजगाँइलाई नायब प्रमुख कार्यकारी अधिकृतमा बढुवा गरेको छ भने भिष्म न्यौपानेलाई कम्पनी सचिवको जिम्मेवारी दिएको छ।
नबिल बैंक नेपालकै निजी क्षेत्रको अग्रणी बैंक हो जसले २४ लाखभन्दा बढी ग्राहकलाई २६८ शाखा र ३२० एटिएम मेसिनमार्फत सेवा प्रदान गर्दै आएको छ। बैंकले नवीनतम बैंकिङ सेवाहरू सुरु गरेर देशको बैंकिङ विकासमा महत्वपूर्ण योगदान पुर्याउँदै आएको छ।
