काठमाडौँ, साउन १३ – नेपाली कांग्रेसका सभापति तथा पूर्वप्रधानमन्त्री शेरबहादुर देउवाले जनताले सबै कामको दोष नेताहरूको काँधमा थोपार्ने प्रवृत्ति रोक्नुपर्ने धारणा राखेका छन्।
कांग्रेस केन्द्रीय कार्यालय सानेपामा आयोजित एक कार्यक्रममा बोल्दै देउवाले विगतमा नेपाली कांग्रेसले देशको आर्थिक संरचनामा ल्याएको परिवर्तनको स्मरण गरे। उनले उल्लेख गरे कि पार्टी नेतृत्वमा गिरिजाप्रसाद कोइराला प्रधानमन्त्री हुँदा ल्याइएको उदारीकरण नीतिका कारण धेरै आलोचना खेप्नुपरेको थियो।
उनले भने, “यदि समस्या छ भने सरकारलाई बताउनुहोस्, हामी सँगै बसेर समाधान खोज्न तयार छौं, तर, आफू केही नगर्ने अनि सारा दोष नेतामाथि दिने प्रवृत्ति राम्रो होइन। व्यवसाय वा उद्योग सञ्चालन गर्न मिहिनेत जरुरी छ, त्यो सरकारको काम होइन।”
देउवाले व्यापार तथा उद्योग क्षेत्रको विकासको लागि सरकारले सधैँ सहकार्य गर्न तयार रहेको बताए। उनले स्पष्ट पारे कि उद्यम गर्नुपर्ने जिम्मेवारी निजी क्षेत्रकै हो, तर सफल नभएमा त्यसको दोष नेताहरूलाई मात्र दिने प्रवृत्तिले समस्या समाधान नहुने बताए।
कार्यक्रममा देउवाले विगतका नीति निर्णयलाई स्मरण गर्दै भने, “गिरिजाबाबुले निजीकरणलाई अघि बढाउँदा आलोचना खेप्नुपर्यो, तर त्यो नीति देशको आर्थिक विकासका लागि आवश्यक थियो। आज पनि हामीलाई दोष दिनुहुन्छ, तर हामीले त त्यस्तो निर्णय नै गरेका छैनौं।”
