काठमाडौं, १८ असार — केही समयअघि ‘हेरा फेरी ३’ फिल्म छाड्ने निर्णय गरेका चर्चित अभिनेता परेश रावल अन्ततः फिल्ममा फर्किने भएका छन्। रचनात्मक मतभेदका कारण उनले फिल्मबाट बाहिरिने घोषणा गरेका थिए, तर अहिले सबै विवाद समाधान भइसकेको उनले पुष्टि गरेका छन्।
फिल्म निर्माता फिरोज नाडियाडवालाका अनुसार, साजिद नाडियाडवाला, निर्देशक अहमद खान र अभिनेता अक्षय कुमारको व्यक्तिगत प्रयासले फिल्म टिमबीचको मतभेद मिलेको हो।
फिरोजले भने, “साजिदको माया र मार्गदर्शन, अहमद खानको सहयोग, र अक्षय कुमारको भावनात्मक समर्थनले ‘हेरा फेरी’ परिवार फेरि एकजुट भएको छ।”
परेश रावलले एक अन्तर्वार्तामा भनेका छन्, “दर्शकसँग हाम्रो जिम्मेवारी हुन्छ। जुनसुकै काम गरियोस्, त्यो जिम्मेवारीपूर्वक गर्नुपर्छ। विवाद खासै थिएन, तर हामी सबैले सुधार गरेर अगाडि बढ्नुपर्ने महसुस गर्यौं।”
पहिले फिल्म छाड्दा, उनले साइनिङ रकम ११ लाख रुपैयाँ ब्याजसहित फिर्ता गरेका थिए। कानुनी नोटिस पठाइएको प्रसंगमा उनले कुनै विवाद नरहेको र सबै कुरा सहमतिको आधारमा समाधान भएको बताएका छन्।
अब प्रियदर्शनको निर्देशनमा बन्ने ‘हेरा फेरी ३’ मा अक्षय कुमार, सुनिल सेट्टी र परेश रावलको चर्चित तिकडी पुनः एकसाथ देखिनेछ, जुन खबरले प्रशंसकहरूलाई निकै उत्साहित बनाएको छ।
