२६ जेठ, काठमाडौं – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले देशमा जनयुद्ध र जनआन्दोलनबाट प्राप्त उपलब्धिहरू उल्ट्याउने प्रयास भइरहेको भन्दै ती विरुद्ध वाईसीएललाई सशक्त रूपमा उभिन निर्देशन दिएका छन्।
मंगलबार राजधानीमा आयोजित कार्यक्रममा नवनिर्वाचित वाईसीएल पदाधिकारीहरूलाई सम्बोधन गर्दै प्रचण्डले प्रतिक्रियावादी र प्रतिगमनकारी शक्तिहरूले मुलुकको परिवर्तनकारी यात्रालाई पछाडि फर्काउने षड्यन्त्र गरिरहेको आरोप लगाए। यद्यपि उनले ती शक्तिहरू को हुन् भन्ने विषयमा स्पष्ट खुलासा गरेनन्।
“कहीँ न कहीँ जनयुद्ध र जनआन्दोलनबाट प्राप्त उपलब्धिहरूलाई उल्ट्याउने प्रयासहरू भइरहेका छन्,” प्रचण्डले भने, “युवाहरू, माओवादी आन्दोलन, जनमुक्ति सेना र वाईसीएलको योगदानलाई होच्याउने र अपमान गर्ने प्रयास पनि भइरहेको छ।”
प्रचण्डले वाईसीएललाई पार्टीको “जनरल स्टाफ” का रूपमा परिभाषित गर्दै यसले पार्टीको आदेशअनुसार राजनीतिक स्थायित्व, लोकतान्त्रिक उपलब्धि र परिवर्तनको रक्षार्थ दृढ भूमिका निर्वाह गर्नुपर्ने उल्लेख गरे। उनका अनुसार, हाल कतिपय शक्तिहरू जनयुद्ध, माओवादी आन्दोलन, र युवाको योगदानलाई अपहेलित गर्ने प्रयासमा छन्, जसविरुद्ध वाईसीएलले स्पष्ट र ठोस प्रतिरोध देखाउनुपर्छ।
उनले हालै निर्वाचित वाईसीएलको ७५ सदस्यीय नेतृत्व टोलीलाई संगठन सशक्त बनाउने जिम्मेवारीसमेत दिएको बताए। संगठन ठूलो भए पनि कार्यदिशा स्पष्ट हुनुपर्ने भन्दै उनले नेतृत्वमा कार्यदक्षता र अनुशासनको अपेक्षा व्यक्त गरे।
