२६ जेठ, काठमाडौं — प्रतिनिधि सभाको बैठकमा आज पनि विपक्षी दलहरूले भिजिट भिसा प्रकरणलाई लिएर अवरोध जारी राखेका छन्। विपक्षीहरूले गृहमन्त्री रमेश लेखकको राजीनामा माग्दै बैठक अवरुद्ध गरिरहेका छन्।
सभामुख देवराज घिमिरे र सत्ता तथा विपक्षी दलहरूबीच निरन्तर छलफल भए पनि अहिलेसम्म सहमति हुन सकेको छैन।प्रमुख प्रतिपक्ष राष्ट्रिय स्वतन्त्र पार्टी (रास्वपा) गृहमन्त्रीको राजीनामाबाट पछि हट्न तयार देखिएको छैन भने माओवादी केन्द्र भने सहमतिमा पुग्न मध्यमार्गी प्रस्तावमा अघि बढ्नुपर्ने पक्षमा छ।
आजै नेपाली कांग्रेसका वरिष्ठ नेता पूर्णबहादुर खड्का र प्रमुख सचेतक श्यामकुमार घिमिरेले रास्वपाका प्रमुख सचेतक सन्तोष परियारसँग छलफल गरे पनि ठोस सहमति हुन सकेन। कांग्रेसले अख्तियारमा अनुसन्धान भइरहेका विषयमा छुट्टै छानबिन समिति नबनाउने अडान लिएको छ, जसले रास्वपाको असहमति बढाएको हो।
एकीकृत समाजवादीका उपाध्यक्ष राजेन्द्र पाण्डेका अनुसार छानबिन समिति गठन गर्ने विषयमा छलफल जारी छ, तर सत्तापक्ष तयार नभएकाले संसदको बैठक अनिश्चित छ। जेठ १३ गतेदेखि विपक्षी दलहरूले भिजिट भिसा मुद्दा उठाएर प्रतिनिधि सभाको बैठक रोक्दै आएका छन् र जेठ १५ गते बाहेक अन्य दिनको बैठक कार्यसूचीमा प्रवेश गर्न सकेको छैन।
सभामुख घिमिरेले संसद् अवरोध अन्त्यका लागि पहल जारी रहेको बताएका छन्, तर गम्भीर राजनीतिक सहमतिविना प्रतिनिधिसभा पुनः सञ्चालन हुने सम्भावना तत्काल देखिएको छैन।
