काठमाडौं, २४ असार — सत्तारुढ दल नेकपा एमालेले रास्वपा सांसद सोबिता गौतमले प्रधानमन्त्री केपी शर्मा ओलीको स्पेन भ्रमणसम्बन्धी दिएको अभिव्यक्ति संसदको आधिकारिक रेकर्डबाट हटाउन माग गरेको छ। सांसद गौतमले प्रधानमन्त्रीसँग स्पेन भ्रमणमा गएका केही व्यक्तिहरू नफर्किएको समाचार आएको भन्दै उक्त विषयलाई गम्भीर रूपमा उठाएकी थिइन्।
तर, एमालेका सांसद बर्तौला राउतले सो अभिव्यक्तिप्रति आपत्ति जनाउँदै संसदको रेकर्डबाट हटाउनुपर्ने माग गरेका छन्। उनले भने, “प्रधानमन्त्री ओली स्पेनको अन्तर्राष्ट्रिय कार्यक्रममा सहभागी भएर फर्किसकेका छन्। केही मान्छे स्पेनमै बसेका छन् वा भिजिट भिसामा गएर फर्किएका छैनन् भन्ने विषय संसदमा प्रस्तुत गर्नु भ्रामक र तथ्यहीन हो।” बर्तौलाले यसप्रकारका विषयहरू संसदको गरिमामय वातावरणमा उपयुक्त नरहेको र जिम्मेवार सांसदहरूले तथ्यहीन कुरा गर्न नहुने बताए।
साथै, उनले सो विषयमा को–को नफर्किएका हुन् भन्ने स्पष्ट रूपमा संसदमा जानकारी दिन चुनौतीसमेत दिएका छन्। एमालेको यो मागले संसदमा उठेका विवादहरू अझै तातिरहेका छन्।
