काठमाडौं, भदौ १ — बागमती प्रदेशका १३ जिल्लाका पत्रकारहरूलाई अब निःशुल्क स्वास्थ्य बिमा उपलब्ध गराइने भएको छ। भक्तपुरमा सञ्चारकर्मीहरूसँगको भेटमा प्रदेशका स्वास्थ्य मन्त्री किरण थापाले प्रदेश सरकारले पत्रकारहरूको स्वास्थ्य सुरक्षामा ध्यान दिँदै बिमाको खर्च व्यहोर्ने व्यवस्था गरिसकेको जानकारी दिए।
कार्यक्रम अनुसार प्रत्येक पत्रकारलाई पाँच सदस्यीय परिवार मान्दै समूहमा आबद्ध गरी डिजिटलमैत्री प्रणालीमार्फत बिमा गरिनेछ। चालु आर्थिक वर्षका लागि स्वास्थ्य मन्त्रालयले रु २० लाख बजेट छुट्याइसकेको छ। बिमाले पत्रकारहरूको दीर्घकालीन स्वास्थ्य सुरक्षा सुनिश्चित गर्ने विश्वास व्यक्त गरिएको छ।
मन्त्री थापाले यस योजनासँगै ‘मेरो स्वास्थ्य, मेरो जिम्मेवारी, एक घण्टा मेरो लागि’, ‘एक जिल्ला, एक स्वस्थ सहर’, र ‘एक स्थानीय तह, एक नमूना स्वास्थ्य संस्था’ कार्यक्रम समेत यसैवर्षबाट सञ्चालनमा आउने जानकारी दिए। उनले दुर्गम तथा विकट क्षेत्रसम्म स्वास्थ्य सेवाको पहुँच पुर्याउने काम अघि बढाइरहेको बताए।
