काठमाडौँ, साउन १९ – संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले बुद्धको जन्मस्थल लुम्बिनी भएकाले नेपाल विश्वभर चिनिएको बताएका छन्। गुरु पद्मसंभवको जन्म दिवसको अवसरमा आयोजित विशेष कार्यक्रममा उनले विश्वभर नेपालप्रतिको आत्मीयता बढिरहेको उल्लेख गरे।
मन्त्री पाण्डेका अनुसार, बुद्धको शिक्षाले आज पनि मानिसहरूलाई मार्गदर्शन गरिरहेको छ र यो प्रभाव निरन्तर बढ्दैछ। उनले भने, “भौतिक सम्पत्ति सिमित मात्रामा सन्तुष्टि दिन सक्छ, तर अन्तर्मनको शान्ति बुद्धको मार्गबाट मात्र प्राप्त गर्न सकिन्छ।”
नेपाल सरकारले ऐतिहासिक, धार्मिक र आध्यात्मिक सम्पदाको संरक्षण, प्रचारप्रसार तथा विश्वसामु प्रभावकारी रुपमा प्रस्तुत गर्ने कुरालाई आफ्नो प्राथमिकतामा राखेको पनि उनले बताए। यसले नेपालको सांस्कृतिक र धार्मिक महत्वलाई अझ मजबुत बनाउने अपेक्षा गरिएको छ।
