काठमाडौं, भदौ २५ — राष्ट्रिय मानव अधिकार आयोगले लोकतन्त्रको विकल्प लोकतन्त्र मात्र हुने बताउँदै कुनै पनि पक्षलाई हिंसात्मक कार्य नगर्न र नगराउन आग्रह गरेको छ।
आयोगले देशका विभिन्न शहरहरूमा भएका प्रदर्शन र त्यसपछि लागाइएको निषेधाज्ञाको समयमा मानव अधिकारको स्थिति तथा मृतक परिवार र घाइतेहरूको अवस्था बुझ्ने कार्य लगातार गर्दै आएको जनाएको छ।
आयोगले जारी विज्ञप्तिमा शान्तिपूर्ण, लोकतान्त्रिक विधि र प्रक्रियाबाट देशले हालको राजनीतिक संकटबाट यथाशीघ्र निकास खोज्नुपर्नेमा जोड दिएको छ। साथै सबै नागरिक र राज्यका निकायले सकारात्मक भूमिका निर्वाह गरी अगाडि बढ्न आवश्यक रहेको आयोगले औंल्याएको छ।
आयोगका प्रवक्ता डा. टीकाराम पोखरेलले भनेका छन्, “लोकतन्त्रको विकल्प लोकतन्त्र मात्र हुन सक्छ। यसले जनताको अधिकार र हकलाई अझ मजबुत बनाउनेछ। कोही पनि हिंसात्मक र भड्किलो कार्यमा नजाऔं र नगराऔं।” आयोगले आगामी दिनमा यस्तो हिंसात्मक घटना नहुने कुरामा विश्वास व्यक्त गर्दै सबैलाई संयम र सहिष्णुता अपनाउन आह्वान गरेको छ।
