काठमाडौं, भदौ ८ — नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीभित्र दलाल, बिचौलिया र नोकरशाहीसँग जोडिएका व्यक्तिहरूलाई अब स्थान नदिने स्पष्ट संकेत गरेका छन्।
पार्टी केन्द्रीय कार्यालय पेरिसडाँडामा आयोजित आर्थिक उत्पादन विभागको पहिलो बैठकलाई सम्बोधन गर्दै प्रचण्डले माओवादी केन्द्रलाई समाजवादतर्फ रूपान्तरण गर्न उत्पादन संघर्षलाई आधार बनाउनुपर्ने बताए। उनका अनुसार, “युद्ध होइन, उत्पादन संघर्ष” भन्ने नारा व्यवहारमै उतार्न नसक्दा पार्टी कमजोर भएको छ र अब हरेक सदस्यले आफ्ना सोच र कार्यशैलीमा आमूल परिवर्तन गर्न जरुरी छ।
उनले पार्टीका कतिपय नेताहरू शान्ति प्रक्रियापछि समाजवादी सोचतर्फ केन्द्रित हुनुपर्नेमा उल्टै दलाल पुँजीवाद र चन्दा प्रवृत्तिमा फसेको उल्लेख गर्दै त्यस्तो प्रवृत्ति पार्टीभित्र दीर्घकालीन रूपमा टिक्न नसक्ने चेतावनी दिए।
प्रचण्डले सहकारी आन्दोलनलाई जनमुखी र समाजवादी स्वरूपमा अघि बढाउनुपर्नेमा जोड दिंदै कृषि, उद्योग, जडीबुटी र पर्यटनजस्ता स्थानीय सम्भावनामा आधारित उत्पादनलाई आत्मनिर्भर अर्थतन्त्रको मेरुदण्डका रूपमा विकास गर्नुपर्ने बताए।
उनका अनुसार, माओवादी केन्द्र नै नेपालको समाजवाद निर्माण गर्ने वास्तविक सम्भावना बोकेको पार्टी हो, तर त्यसका लागि उत्पादनलाई प्राथमिकता दिँदै समुदायसँग प्रत्यक्ष सम्बन्ध जोड्न आवश्यक छ। सरकारमा रहँदा पनि आफूले दलाल र बिचौलियाविरुद्ध सुशासन, सामाजिक न्याय र समृद्धिको पक्षमा संघर्ष गरेको उनले स्मरण गरे।
