काठमाडौँ, साउन २४ – काठमाडौंको बनस्थलीस्थित राष्ट्रिय स्वतन्त्र पार्टी कार्यालयमा यस वर्षको रक्षा बन्धन फरक शैलीमा मनाइयो। पार्टीका सभापति रवि लामिछानेको ठूलो आकारको कटआउट प्राङ्गणको मुख्य आकर्षण बनेको थियो, जहाँ बिहानैदेखि विभिन्न स्थानबाट आएका समर्थकहरूको भीड लागेको थियो।
समर्थकहरूले पालैपालो कटआउटमा राखी बाँध्दै उनको दीर्घायु, सफल राजनीतिक यात्रा र चाँडो रिहाईको कामना गरे। धेरैले यस कार्यलाई दाजुभाइबीचको स्नेह मात्र नभई अन्यायविरुद्धको एकताको प्रतीकको रूपमा लिए। उनका समर्थकहरूले राखी बाँधेर रवि लामिछानेको सुरक्षाका लागि प्रतिकात्मक प्रतिज्ञा गरेको जनाए।
राष्ट्रिय स्वतन्त्र पार्टीले यस कार्यक्रमलाई अन्यायविरुद्ध ऐक्यबद्धता जनाउने माध्यमका रूपमा अघि बढाएको छ। सहकारी ठगी मुद्दामा थुनामा रहेका रवि लामिछानेलाई समर्थन र फरक किसिमले रक्षा बन्धन मनाउने यस किसिमको कार्यक्रमले राजनीतिक संघर्षको पाटो पनि देखाएको छ।
