काठमाडौँ, असार २८ — नेकपा (माओवादी केन्द्र) का सांसद राजन दाहालले वर्तमान कांग्रेस–एमाले नेतृत्वको सरकारलाई तीव्र आलोचना गर्दै पूर्ण रूपमा असफल सरकारको संज्ञा दिएका छन्। काठमाडौँमा आयोजित एक कार्यक्रमका क्रममा उनले प्रधानमन्त्री ओलीको नेतृत्वमा रहेको सरकारले भ्रष्टाचार, अराजकता र माफिया संस्कृति प्रोत्साहन गरेको आरोप लगाए।
दाहालले वर्तमान सरकार बिचौलिया र माफियाको हितमा बनेको दाबी गर्दै, एक वर्षको कार्यकालमा यसले “भ्रष्टाचार र कुशासनमा पीएचडी” गरेको टिप्पणी गरे। उनले जनताको नजरमा सरकार ढलिसकेको, र अब यसको प्राथमिकता विकास नभई ‘कमिसन’ भएको दाबी गरे।
उनका अनुसार, पूर्वप्रधानमन्त्री पुष्पकमल दाहाल ‘प्रचण्ड’को पालामा थुप्रै भ्रष्टाचारका मुद्दाहरू अगाडि बढाइएका भए पनि अहिले उल्टै भ्रष्टाचारमा संलग्नहरूलाई जोगाउने काम भइरहेको छ। नक्कली भुटानी शरणार्थी प्रकरण, गिरिबन्धु टी-स्टेट काण्डलगायतका मुद्दाहरू दबाइएको उनको आरोप छ।
दाहालले पूर्वराष्ट्रपति विद्यादेवी भण्डारीको सक्रिय राजनीतिमा फर्कनु वामपन्थी एकताका लागि सकारात्मक पहल भएको बताए पनि एमाले अध्यक्ष केपी शर्मा ओलीकै प्रभाव र नियन्त्रणमा रहेको भन्दै तत्काल एकताको सम्भावना अस्वीकार गरे। उनले भने, “एमाले ओलीको अपहरणबाट मुक्त नभएसम्म वामपन्थी एकता सम्भव छैन।”
संविधानको रक्षा र कार्यान्वयनको सन्दर्भमा एमालेभन्दा नेपाली कांग्रेस सापेक्षिक रूपमा प्रगतिशील भएको भन्दै कांग्रेससँग सहकार्य गर्न सकिने संकेत पनि उनले दिए।
