काठमाडौं, साउन २१ — गाजा क्षेत्रमा मानवीय सहायता लिएर जाँदै गरेको ट्रक एक भिडमाथि पल्टिँदा कम्तीमा २० जना प्यालेस्टिनीको ज्यान गएको छ। घटनामा कैयौं अन्य घाइते भएका छन्।
मंगलबार राति मध्य गाजा पट्टीस्थित एक शरणार्थी शिविर नजिक यो दुःखद घटना भएको बताइएको छ। हमासद्वारा सञ्चालित नागरिक सुरक्षा निकायका प्रवक्ता महमुद बस्सलका अनुसार दुर्घटना ट्रकको असन्तुलनका कारण भएको हुनसक्ने अनुमान गरिएको छ। राहतका सामग्री लिन भीड जम्मा भएकै बेला ट्रक पल्टिएको हो।
इजरायली सेनाले घटनाको अनुसन्धान सुरु गरेको जनाएको छ। यसबीच, संयुक्त राष्ट्र संघले सार्वजनिक गरेको पछिल्लो तथ्यांकअनुसार, मे महिनाको अन्त्यसम्म गाजामा खाद्यान्न र राहतको खोजीमा मात्र १,३०० भन्दा बढी व्यक्तिको ज्यान गइसकेको छ।
युद्धग्रस्त गाजामा राहतको आवश्यकता अझै तीव्र छ भने वितरण प्रक्रियामा चुनौती अझ बढ्दै गएको देखिन्छ।
