काठमाडौं, साउन १४ — रुसको कामचट्का प्रायद्वीप नजिक ८.८ म्याग्निच्युडको शक्तिशाली भूकम्प गएको छ, जसको प्रत्यक्ष प्रभाव जापानमा समेत परेको छ।
भूकम्पपछि उत्पन्न सुनामीको सम्भावनालाई लिएर जापानी अधिकारीहरूले सतर्कता बढाएका छन् र आपत्कालीन रूपमा झण्डै १९ लाखभन्दा बढी नागरिकलाई सुरक्षित स्थानतर्फ जान आदेश दिएका छन्।
जापानको मौसम विज्ञान विभागले चेतावनी जारी गर्दै, प्रशान्त तट क्षेत्र हुँदै देशको उत्तरको होक्काइदोदेखि दक्षिणको वाकायामा प्रान्तसम्म सुनामीका ठूला छालहरू आइपुग्न सक्ने बताएको छ। विभागले केही समुद्री भागहरूमा तीन मिटर (९.८ फिट) सम्मको छाल आउन सक्ने प्रक्षेपण गरेको छ।
बीबीसी लगायतका अन्तर्राष्ट्रिय सञ्चारमाध्यमहरूले जनाएअनुसार जापानको प्रशान्त तटमा केही स्थानमा पहिले नै सुनामीका लहरहरू देखिन थालेका छन्। अधिकारीहरूले जनतालाई तत्काल सुरक्षाका उपाय अवलम्बन गर्न र स्थानीय निकायको निर्देशन पालना गर्न अनुरोध गरेका छन्।
हालसम्म मानवीय क्षति वा विस्तृत भौतिक क्षतिको विवरण सार्वजनिक भएको छैन, तर सम्भावित ठूलो जोखिमलाई दृष्टिगत गर्दै सतर्कता अत्यधिक बढाइएको छ।
