२४ जेठ, काठमाडौं — रुसले युक्रेनको दोस्रो ठूलो सहर खार्किभमा व्यापक मिसाइल र ड्रोन आक्रमण गरेको छ, जसमा तीन जनाको मृत्यु भएको र दर्जनौं घाइते भएका छन्। खार्किभका मेयर इगोर टेरेखोभका अनुसार, रुसले कम्तिमा ४८ वटा ड्रोन, दुई मिसाइल र चार गाइडेड बम प्रयोग गरी एकैपटक सहरका विभिन्न क्षेत्रमा आक्रमण गरेको छ। उनले यसलाई युद्ध सुरु भएयताकै सबैभन्दा शक्तिशाली आक्रमण भनेका छन् र निहत्था नागरिकमाथिको खुल्ला आतंकको रूपमा वर्णन गरेका छन्।
आक्रमणले खार्किभको एक प्रशासनिक भवन, संगीत विद्यालय र धेरै आवासीय भवनहरूमा क्षति पुर्याएको छ। युक्रेनी आपतकालीन सेवाले ओस्नोभ्यान्स्की जिल्लामा रहेको आवासीय भवनमा ठूलो आगलागी भएको र दुई जनाको मृत्यु भएको पुष्टि गरेको छ। उत्तरी किभ्स्की जिल्लामा भएको अर्को आक्रमणमा पनि एक जनाको मृत्यु भएको छ। घाइतेहरूमा डेढ महिनाको शिशु र १४ वर्षीया बालिका समेत छन्।
युक्रेनी सेनाले रुसी आक्रमणको जवाफी कारवाहीमा रुसको सू–३५ लडाकु विमान खसाएको दाबी गरेको छ। रुसी सैनिक भ्लगरले विमान खसेको र पाइलट उद्धार गरिएको बताएका छन्।
यसअघि युक्रेनले रुसी लडाकु विमानहरूमा क्षति पुर्याउने एफपीभी ड्रोन प्रयोग गरेर आक्रमण गरेको थियो, जसले मस्कोको आक्रामकता बढाएको बताइएको छ। रुसी आक्रमणले युक्रेनका विभिन्न क्षेत्रमा पनि ठूलो क्षति पुर्याएको छ र यसले युद्धलाई पुनः चर्काएको छ।
