काठमाडौं, असार १२ — गृहमन्त्री रमेश लेखकले लागुऔषध नियन्त्रणका लागि छुट्टै विभाग गठन गरिने घोषणा गरेका छन्। बिहीबार काठमाडौंमा आयोजित ‘लागुऔषध दुरुपयोग तथा अवैध ओसार–पसार विरुद्धको अन्तर्राष्ट्रिय दिवस’को अवसरमा बोल्दै उनले आगामी आर्थिक वर्षभित्र गृह मन्त्रालयअन्तर्गत लागुऔषध नियन्त्रण विभाग स्थापना गरिने जानकारी दिए।
मन्त्री लेखकले लागुऔषध नियन्त्रणलाई सरकारको उच्च प्राथमिकतामा राखिएको उल्लेख गर्दै, यस अभियानलाई प्रभावकारी बनाउन संरचनागत सुधार आवश्यक रहेको बताए। उनले विभाग गठनसँगै लागुऔषध दुरुपयोग र तस्करी नियन्त्रणमा थप प्रभावकारिता आउने विश्वास व्यक्त गरे।
उनका अनुसार, नयाँ विभागले अनुसन्धान, निगरानी र नियन्त्रणका गतिविधिहरूलाई एकीकृत ढंगले अघि बढाउनेछ। साथै, लागुऔषधसम्बन्धी अपराध नियन्त्रणका लागि आवश्यक नीति तथा कार्यक्रमहरू सञ्चालन गरिनेछ।
