काठमाडौं, साउन ६ — पूर्वराष्ट्रपति विद्यादेवी भण्डारीले आफूले सक्रियताबाट पछि हट्ने कुनै योजना नरहेको स्पष्ट पारेकी छन्। राजधानीको भंगालमा आयोजित राजनीतिक संवादमा उनले आफू अझै अगाडि बढ्ने मनस्थितिमा रहेको बताइन्।
भण्डारीले राजनीतिक रुपमा आफूलाई रोक्न खोज्नु र आफ्ना पक्षमा बोल्नेहरुलाई आतंकित पार्ने प्रयास भइरहेको उल्लेख गरिन्। उनले यस्तो प्रवृत्ति तुरुन्त बन्द गर्नुपर्ने माग गरिन्।
“म अघि बढिसकेकी छु। अब खुट्टा कमाउने पक्षमा छैन। मेरो पक्षमा बोल्नेहरुलाई धम्क्याउने, डराउने काम बन्द हुनुपर्छ,” पूर्वराष्ट्रपति भण्डारीले भनिन्।
उनले एमालेको राजनीतिमा फर्कने निर्णय सजिलैमा नआएको र यसअघि नै आफूले लामो समयदेखि विचार बनाउँदै आएको बताइन्। राजनीतिक वृत्तमा उनको सक्रियताले नयाँ तरंग ल्याएको छ।
