काठमाडौं, असोज ४ — निसीखोला गाउँपालिका–४ झिम्पामा निर्माणाधीन १० श्ययाको आधारभूत अस्पताल बजेट नपुग्दा अधुरो बनेको छ। २०७८ माघमा सम्झौता भई रु. ८ करोड २४ लाखको लागतमा सुरु गरिएको अस्पताल २०८० पुसभित्र सम्पन्न गर्ने योजना थियो। तर हालसम्म करिब ८० प्रतिशत मात्र काम सम्पन्न भएको छ।
रङरोघन, विद्युत् जडान र अन्तिम फिनिसिङजस्ता काम बाँकी रहे पनि बजेट नआउँदा निर्माण एक वर्षदेखि रोकिएको ठेकेदार कम्पनीका प्रमुख दीपककुमार अदैले बताए। उनका अनुसार पालिकाले अझै करिब १ करोड १० लाख भुक्तानी गरेको छैन, साथै थप ६० लाख बजेट जुटाउन सके काम तत्कालै सकिन सक्ने अवस्था छ। “अस्पतालको काम धेरै छैन, तर बजेट अभावकै कारण थन्किएको हो,” अदैले भने।
निसीखोला गाउँपालिकाका प्रमुख प्रशासकीय अधिकृत जीवन पुन मगरका अनुसार यो अस्पताल संघीय सरकारको योजना अन्तर्गत परेकाले स्थानीय तहले थप बजेट व्यवस्थापन गर्न नसकेको हो। संघीय सरकारबाट आउने १ करोड ५० लाख नआउँदा समस्या बढेको उनको भनाइ छ।अधिकृत पुन मगरले स्वास्थ्य र अर्थ मन्त्रालयमा पटक–पटक बजेट माग गरिए पनि हालसम्म प्राप्त नभएको बताए। “संघीय स्तरबाट बजेट उपलब्ध हुनेबित्तिकै काम अघि बढाउने तयारी छ,” उनले स्पष्ट पारे।
चार वर्षदेखि सुरु भएको अस्पताल समयमै सकिन नसक्दा स्थानीयवासी निराश बनेका छन्। उनीहरूले छिट्टै बजेट उपलब्ध गराएर अस्पताल सञ्चालनमा ल्याउन सरकारसँग माग गरेका छन्।
