काठमाडौं, साउन १६ — प्रधानमन्त्री केपी शर्मा ओलीले ‘समृद्ध नेपाल, सुखी नेपाली’ नै सरकारको सर्वोच्च र पवित्र उद्देश्य भएको स्पष्ट पारेका छन्। भक्तपुरमा आयोजित बागमती प्रदेशलाई पूर्ण खोप सुनिश्चित प्रदेश घोषणा कार्यक्रममा बोल्दै उनले स्वास्थ्य क्षेत्रलाई बलियो बनाउँदै निरोगी राष्ट्र निर्माणको लक्ष्य प्रस्तुत गरे।
उनका अनुसार समृद्धि हासिल गर्न देशलाई आधुनिक, विकसित र स्वावलम्बी बनाउन जरुरी छ। उनले भने, “जनता सुखी भए मात्र नेपाल समृद्ध बन्छ, त्यसैले हामी जनताको स्वास्थ्य र समृद्धिमा केन्द्रित छौं।”
प्रधानमन्त्रीले वातावरणीय शुद्धता र जैविक सुरक्षालाई जोड दिँदै देशमा न त मानिस, न जनावर, न वनस्पति र न चराचुरुंगीमा रोग फैलिने अवस्था रहनु नपर्ने बताए। उनले जोड दिए, “नेपाल यस्तो बनोस्, जहाँ कसैले पनि विषादी खाएर बस्न नपरोस्।”
कार्यक्रममा प्रधानमन्त्री ओलीले पूर्ण खोप सुनिश्चित गर्नु सरकारको सामाजिक उत्तरदायित्व भएको उल्लेख गर्दै स्वास्थ्य क्षेत्रमा गरिएको लगानी दीर्घकालीन परिवर्तनको आधार हुने धारणा राखे।
