काठमाडौँ, १५ भदौ – नेकपा माओवादी केन्द्रकी सांसद मिना तामाङले मुलुकको समृद्धि सुनिश्चित गर्न केवल जलविद्युत आयोजना मात्र आधार नहुने बताएकी छन्। उनले उद्योग, कलकारखाना, प्राकृतिक स्रोत र संरक्षण क्षेत्रको दिगो व्यवस्थापन पनि महत्वपूर्ण भूमिका खेल्ने बताइन्।
आइतबार कृषि, सहकारी तथा प्राकृतिक स्रोत समितिको बैठकमा सांसद तामाङले जलविद्युत आयोजना, खानी, हावा र पानीका स्रोत, वन तथा जडिबुटी राष्ट्रको धनी भएकोले यसलाई राज्यले दिगो र प्रभावकारी ढंगले सञ्चालन गर्नुपर्नेमा जोड दिइन्।
उनले भने, “हिजोका बन्द भएका जुट मिल र जनकपुर कारखाना जस्ता उद्योग फेरि सञ्चालनमा ल्याउने विषयमा हाम्रो ध्यान पुग्नु आवश्यक छ। तर सामान्य जनताको नजरमा समृद्धि भनेको जलविद्युत र खानी मात्र देखिन्छ।”
सांसद तामाङले निजी कम्पनीको सहभागिता र स्रोत व्यवस्थापनबीच सन्तुलन कायम गर्नुपर्ने, संरक्षण क्षेत्र र कानुनी नियमहरूको प्रभावकारी कार्यान्वयन सुनिश्चित गर्न राष्ट्रिय स्तरमा छलफल आवश्यक रहेको पनि बताइन्।
उनका अनुसार, हाल जलविद्युत निर्माणमा निकुञ्ज तथा संरक्षण क्षेत्रमा अवरोध कानुनले गरेको हो, न कि वन मन्त्रालयले। सांसद तामाङले यस विषयमा कानुन संशोधन गरेर दीगो विकास सुनिश्चित गर्नुपर्नेमा जोड दिइन्।
