काठमाडौं, साउन १ — नेपालले साफ वुमेन्स यू-२० च्याम्पियनसिप अन्तर्गत बिहीबार खेलिएको खेलमा श्रीलंकामाथि भव्य जित हात पारेको छ। बंगलादेशको ढाकास्थित बसुबन्धरा स्पोर्ट्स ग्राउन्डमा भएको खेलमा नेपालले श्रीलंका विरुद्ध ७-० को ठूलो अग्रता बनाउँदै तेस्रो जित हासिल गरेको हो।
यो जितसँगै नेपालले चार खेलबाट नौ अंक जम्मा गरिसकेको छ। प्रतियोगितामा नेपालले यसअघि पनि श्रीलंकालाई ७-० ले पराजित गरिसकेको छ।
नेपालका लागि समीक्षा मगरले दुई गोल गरेका थिए भने पूर्णिमा राई, कुसुम खतिवडा, सरिता नाथ र बिर्षणा चौधरीले एक/एक गोल थपेका थिए। यसका साथै एक गोल विपक्षी टोलीको आत्मघाती गोलको रूपमा आएको थियो।
अर्कोतर्फ अनिषा राईले पेनाल्टीमा गोल गर्न नसक्दा टीमलाई थप गोल गर्न अवसर गुमेको थियो। श्रीलंका अहिले चार खेलबाट कुनै अंक छैनन्। सञ्चालनमा रहेको प्रतियोगितामा अर्को खेलमा बिहीबार बंगलादेश र भुटान भिड्नेछन्।
