काठमाडौं, ३ असार – नेकपा एमालेले आफ्नो संगठन सञ्चालनमा महत्वपूर्ण परिवर्तन गर्ने निर्णय गरेको छ। शुक्रबार र शनिबार दुई दिन चलेको पोलिटब्युरो बैठकले पार्टीको विधान संशोधन प्रस्ताव पारित गर्दै अब उमेर सीमा र दुई पदको सीमालाई हटाउने निर्णय गरेको हो।
बैठकपछि प्रचार विभाग प्रमुख राजेन्द्र गौतमले जानकारी दिँदै भने, “विधान संशोधनको प्रस्ताव पोलिटब्युरोले पारित गरिसकेको छ। यसमा केही सामान्य सुझाव पनि समावेश गरिएका छन्। तर मूल कुरा भनेको, दुई सदस्यता र उमेरको सीमा खारेज गर्नु हो।”
यसअघि एमालेमा एक व्यक्तिले दुईभन्दा बढी पद वा जिम्मेवारी लिन नपाउने र नेतृत्व तहमा उमेरको पनि सीमा तोकिएको थियो। अब यो व्यवस्थालाई हटाइएको छ।
बैठकमा सहभागी भएका ६८ जना सदस्यले आ-आफ्नो विचार राखेका थिए। उनीहरूले विभिन्न कोणबाट छलफल गर्दै, संगठनलाई अझ लचिलो र व्यवहारिक बनाउने आवश्यकतामा जोड दिएका थिए।
यस निर्णयसँगै एमालेभित्र नेतृत्व चयनमा लामो समयदेखि चलिरहेको सीमाबन्दी हटेको छ। अब अनुभव र सक्रियता हेरेर जोसुकैलाई जिम्मेवारी दिन सकिने बाटो खुलेको छ।
पार्टीका नेताहरूले यो निर्णयलाई संगठन सुदृढीकरण र परिवर्तनशील परिस्थितिमा सन्तुलन मिलाउने प्रयासको रूपमा लिएका छन्।
