१५ असार, काठमाडौं — मधेश प्रदेश सरकारमा सहभागी जनमत पार्टीभित्र सरकार छाड्ने विषयमा गम्भीर बहस सुरु भएको छ। पार्टीको हालैको सचिवालय बैठकमा सरकारबाट बाहिरिने प्रस्ताव पेश गरिएको छ। पार्टीका सचिव बीपी साहले सरकारमा बसेर जनताको अपेक्षा र पार्टीको नीतिअनुसार काम गर्न नसकिएको भन्दै सरकार छाड्नुपर्ने धारणा व्यक्त गरे।
उनले भने, “हामी जनताको भावना अनुसार निर्णय लिन्छौं। जब पार्टीको नीति र जनताको चाहना अनुसार अगाडि बढ्न सकिँदैन, तब सत्ता टिकाउनुको औचित्य रहँदैन।” साहले आफ्नो प्रस्ताव अध्यक्षसमक्ष राखेको र अध्यक्षले यस विषयमा पार्टीको कार्यकारिणी समितिमा विस्तृत छलफल गरिने बताएका छन्।
हालसम्म पार्टीको औपचारिक निर्णय भइसकेको छैन, तर यो प्रस्तावले पार्टीभित्र सरकारमा बस्ने वा नबस्ने विषयलाई लिएर आन्तरिक विवाद सतहमा ल्याएको देखिन्छ।
मधेश सरकारमा जनमत पार्टीको भूमिकाबारे चाँडै औपचारिक निर्णय आउने संकेत मिलेको छ।
