काठमाडौं, असार १४ — पूर्वराष्ट्रपति विद्यादेवी भण्डारीले आफू पुनः नेकपा एमालेको सक्रिय राजनीतिमा जोडिएको औपचारिक घोषणा गरेकी छन्। स्व. मदन भण्डारीको ७४ औं जन्मजयन्तीको अवसरमा आयोजित कार्यक्रममा सम्बोधन गर्दै उनले पार्टी सदस्यता नवीकरण गरेर एमाले परिवारमा फर्किएको जानकारी दिइन्।
भण्डारीले फरक ढंगको राजनीतिक जिम्मेवारीबाट मुक्त भइसकेपछि अब नेकपा एमालेमै रहेर राजनीतिक यात्रालाई निरन्तरता दिने उद्देश्य रहेको बताइन्। उनले पार्टी सदस्यता नवीकरण गरेर एमाले परिवारको सदस्यको रूपमा पुनः जोडिन पाउँदा गर्व लागेको उल्लेख गरिन्।
उनले आफ्नो कुनै व्यक्तिगत महत्वाकांक्षा नरहेको स्पष्ट पार्दै, देश र जनताको हित नै आफ्नो मुख्य ध्येय भएको बताइन्। भावुक सम्बोधनमा उनले जननेता मदन भण्डारीका भनाइहरू स्मरण गर्दै, राजनीतिमा थकाइ भन्ने शब्दावली नहुने र जनताको सेवा नै सर्वोच्च भएको विचार दोहोर्याइन्।
राजनीतिक यात्रामा आएका उतारचढावले आफूलाई थप परिपक्व बनाएको उल्लेख गर्दै, भण्डारीले अब एमालेको परिवारमा समर्पित भएर अगाडि बढ्ने प्रतिबद्धता जनाइन्।
