काठमाडौं, भदौ २५ — काठमाडौंमा मंगलबार भएको प्रदर्शनका क्रममा सर्वोच्चसहित १७ वटा अदालतमा आगजनी र तोडफोड भएको छ। सर्वोच्च प्रशासनका अनुसार, सर्वोच्च अदालतमा १० प्रतिशत फाइल बाहेक सबै चलु फाइल जलेर खरानी भएका छन्।
अग्नि घटना जिल्लास्तरका अदालतमा पनि फैलिएको छ। काठमाडौँ जिल्ला अदालत, चितवन, कास्की, सप्तरी, बाँके, रुपन्देही, पर्सा, मकवानपुर, कपिलवस्तु लगायतका जिल्ला अदालतमा आगजनी भएको छ। यसैगरी, उच्च अदालत तुलसीपुर–बुटवल, उच्च अदालत विराटनगर, उच्च अदालत जनकपुरको अस्थायी इजलास, उच्च अदालत राजविराज, उच्च अदालत हेटौँडालगायतमा समेत तोडफोड भएको छ।
सर्वोच्च प्रशासनले एनेक्स भवनबाट चार वटा इजलास सञ्चालन गर्ने तयारी गरिरहेको छ, तर अधिकांश फाइल नष्ट भएकाले बाँकी इजलास कहाँ गठन गर्ने र कसरी सञ्चालन गर्ने भन्ने विषयमा छलफल भइरहेको छ। यस घटनाले देशको न्यायिक कार्यमा ठूलो अवरोध सिर्जना गरेको छ।
