काठमाडौं, असोज ३ — भदौ २४ गते जेनजी आन्दोलनका क्रममा सिंहदरबार परिसरमा आगजनी गरिएका सवारी साधनहरू हटाउन थालिएको छ। विभिन्न मन्त्रालय र कार्यालयमा गरिएको आगजनीमा जलेका सयौं सवारी साधन अहिले नयाँबानेश्वरको वीरेन्द्र सम्मेलन केन्द्रको परिसरमा सारिने तयारी भइरहेको छ।
हाल ऊर्जा, जलस्रोत तथा सिंचाइ मन्त्रालय परिसरमा जलेका गाडीहरू हटाउने काम भइरहेको छ भने केही दिनभित्र सिंहदरबारभित्रका सबै जलेका सवारी साधनहरू हटाइसकिने मन्त्रालय स्रोतले जनाएको छ।
ऊर्जा, जलस्रोत तथा सिंचाइ, भौतिक योजना तथा यातायात र सहरी विकासमन्त्री कुलमान घिसिङले जलेका सवारीहरू हटाउने र क्षतिको मूल्यांकन छिट्टै गर्ने निर्देशन दिएका छन्। उनको निर्देशनमा क्षति भएका भवनको पुनर्निर्माणका लागि अभियान समेत सञ्चालन हुने बताइएको छ।
यस प्रक्रियाले सिंहदरबार परिसरको सफाई र मरम्मतमा मद्दत पुर्याउने र सार्वजनिक कार्यालयहरूको सामान्य गतिविधि पुनः सुचारु हुने अपेक्षा गरिएको छ।
