काठमाडौं, असार २१ — उपप्रधानमन्त्री तथा अर्थमन्त्री विष्णुप्रसाद पौडेलले नेपालको समृद्धिको मूल चाबी पर्यटन क्षेत्रमा रहेको बताएका छन्। शनिबार काठमाडौंमा अर्थतन्त्र डटकमले आयोजना गरेको ‘अर्थतन्त्र दशक जर्नल’ सार्वजनिक कार्यक्रमका क्रममा बोल्दै उनले नेपालको पर्यटनमा अपार सम्भावना रहेकाले यसलाई प्राथमिकतामा राखेर अघि बढ्नुपर्ने आवश्यकता औंल्याए।
“समृद्धिको धेरै उपाय छन्,” मन्त्री पौडेलले भने, “तर तीमध्ये पर्यटन एक शक्तिशाली क्षेत्र हो। नेपालमा यसको सम्भावना अनगिन्ती छ। यसलाई अगाडि बढाउन भित्रि मात्र होइन, बाह्य लगानी पनि आवश्यक छ।”
उनले बजेट निर्माण गर्दा पनि पर्यटनलाई विशेष प्राथमिकता दिइएको उल्लेख गरे। पर्यटन पूर्वाधार निर्माणमा निजी क्षेत्रको सहभागिता अपरिहार्य रहेको भन्दै सरकारले लगानीकर्तालाई आकर्षित गर्ने नीति अपनाएको जानकारी गराए।
अर्थमन्त्री पौडेलले मुलुकमा राजनीतिक स्थायित्व कायम गर्दै विकास र समृद्धितर्फ अघि बढ्नुपर्नेमा पनि जोड दिएका छन्, जसले पर्यटन क्षेत्रको विकासलाई थप गति दिने विश्वास व्यक्त गरे।
