काठमाडौं, ३० असार — नेपाली कांग्रेसका महामन्त्री गगन थापाले संघीय मामिला तथा सामान्य प्रशासनमन्त्री राजकुमार गुप्तालाई घुस काण्डमा मुछिएपछि तत्काल बर्खास्त गर्न प्रधानमन्त्रीलाई आग्रह गरेका छन्। मन्त्री गुप्ताको घुस डिल गरेको अडियो सार्वजनिक भएपछि थापाले प्रधानमन्त्रीलाई मन्त्रीलाई तुरुन्त बर्खास्त गर्न अनुरोध गरेका हुन्।
कांग्रेस बुद्धिजीवी विभागद्वारा आयोजित कार्यक्रममा बोल्दै थापाले भने, “यदि मन्त्री निर्दोष हुन् भने तुरुन्त राजीनामा दिएर छानबिनको माग गर्नु पर्ने हो, तर न त उनले राजीनामा दिए, न त प्रधानमन्त्रीले कुनै कारबाही गरे।”
उनले मन्त्रीलाई बर्खास्त गरेर मात्र पुग्ने नभई, विस्तृत छानबिन गरेर दोषी प्रमाणित भए कारबाही गर्नुपर्नेमा जोड दिए। “दूधको दूध, पानीको पानी हुनुपर्छ,” भन्दै थापाले घुसजस्ता गम्भीर आरोपलाई राजनीतिक रूपमा होइन, न्यायिक प्रक्रियाबाट निष्कर्षमा पुर्याउनुपर्ने बताए।
थापाले थप चेतावनी दिए कि यदि प्रधानमन्त्रीले यस्ता मुद्दामा स्पष्ट र छरितो निर्णय लिन सकेनन् भने जनतामा शासन प्रणालीप्रति नै विश्वास घट्न सक्ने खतरा रहेको छ।
