१४ भदौ, काठमाडौं । पूर्वराष्ट्रपति विद्यादेवी भण्डारी आज वीरगञ्जमा आयोजना भएको वृहत महिला सम्मेलनमा सहभागी भएकी छन्।
भण्डारी बिहान सिमरा विमानस्थलमा अवतरण गर्दा एमालेका कार्यकर्ताले ५१ किलो तौलको फूलमालाले उनको स्वागत गरेका थिए। त्यसपछि उनी सडकमार्ग हुँदै वीरगञ्ज पुगेकी हुन्।
यो सम्मेलन वीरगञ्ज उद्योग वाणिज्य संघको आयोजनामा भएको हो। एमाले नेतृत्वले आफ्ना नेता तथा कार्यकर्तालाई कार्यक्रममा सहभागी नहुन निर्देशन दिएको भए पनि पार्टीकै स्थायी कमिटी सदस्य मुकुन्द न्यौपाने, पोलिटब्युरो सदस्य पुरुषोत्तम पौडेल, सचिवालय सदस्य जयप्रकाश थारु, केन्द्रीय सदस्यहरू केदार न्यौपाने, अरविन्द सिंह लगायत नेताहरू कार्यकर्तासहित विमानस्थलमै पुगेका थिए।
यस्तै, मधेश प्रदेश सचिव मनोज पौडेल, वीरगञ्ज महानगर अध्यक्ष नवराज शर्मा, जितपुर सिमरा उपमहानगरपालिकाका उपमेयर भोलाप्रसाद अधिकारीलगायत स्थानीय नेताहरूले पनि पूर्वराष्ट्रपतिको स्वागत गरेका थिए।
भण्डारी वीरगञ्ज उद्योग वाणिज्य संघले आयोजना गरेको वृहत महिला सम्मेलनमा प्रमुख अतिथिका रूपमा सहभागी छ्न् र सम्मेलनमा विभिन्न विधामा महिलाहरूलाई सम्मान गरिने तथा महिला सशक्तिकरण विषयमा प्यानल छलफल हुने तयारी रहेको छ।
