काठमाडौं, साउन १८ — स्पेनमा आयोजित ‘विकासका लागि वित्तको अन्तर्राष्ट्रिय सम्मेलन’ का नाममा नेपालीहरूलाई अवैध रूपमा विदेश पठाइएको प्रकरणमा प्रहरीको अनुसन्धान अवरुद्ध बनेको छ। दिल्लीस्थित स्पेनिस दूतावासले भिजिट भिसा लिएका नेपालीहरूको विवरण अहिलेसम्म नदिएपछि छानबिन अघि नबढेको हो।
केन्द्रीय अनुसन्धान ब्यूरोका एसएसपी होविन्द्र बोगटीको नेतृत्वमा बनेको छानबिन समितिले दुईपटक पत्राचार गरेर विवरण माग्दा पनि कुनै प्रतिक्रिया नआएको एक उच्च प्रहरी अधिकारीले जानकारी दिएका छन्।
जुन ३० देखि जुलाई २ सम्म स्पेनको सेभियामा भएको सम्मेलनमा सरकारी तथा गैरसरकारी संस्था मार्फत सहभागी हुने नाममा धेरै नेपालीलाई भिसा दिइएको थियो। तर, तीमध्ये धेरैजसो सहभागीहरूको सम्मेलनसँग कुनै सम्बन्ध नभएको पाइएको छ।
छानबिनमा संलग्न अधिकारीहरूका अनुसार, स्पेन पठाइएका केही व्यक्तिहरूलाई आयोजक संस्था र उद्देश्यको कुनै जानकारी थिएन। उनीहरूलाई सम्मेलनको बहानामा भिसा दिइएर युरोप प्रवेश गराइएको आशंका गरिएको छ।
नेपाल प्रहरीको छानबिन जारी भए पनि स्पेनिस दूतावासबाट सहयोग नपाउँदा वास्तविक संलग्न पक्षहरू पत्ता लगाउन कठिन भइरहेको छ। प्रहरी स्रोतका अनुसार, यदि दूतावासले सहभागीको नामावली र भिसा प्रक्रिया सार्वजनिक गरेमा धेरै कुराहरू प्रस्टिन सक्थे।
