काठमाडौं — साफ यू–२० महिला च्याम्पियनसिपमा नेपालले जितको नजिक पुग्दा पनि अन्तिम मिनेटमा गोल खाँदै बंगलादेशसँग ३–२ को हार व्यहोरेको छ।
आइतबार ढाकास्थित बसुन्धरा किंग्स एरिनामा भएको रोमाञ्चक खेलमा नेपालले दुई गोलले पछि परेको अवस्थामा पुनरागमन गर्दै खेल बराबरीमा ल्याए पनि इन्ज्युरी समयको आठौं मिनेटमा बंगलादेशकी तृष्णारानी सरकारले निर्णायक गोल गरिन्।
खेलको पहिलो हाफमा बंगलादेशले सिना जहान सिखा र सागोरिकाको गोलबाट २–० को अग्रता लिएको थियो। त्यसपछि नेपालकी अनि राईले पेनाल्टीमार्फत पहिलो गोल गरिन् भने मीना देउवाले दोस्रो गोल थप्दै स्कोर २–२ मा पुर्याइन्।
दुवै टिम दोस्रो हाफमा १०–१० खेलाडीमा सीमित भए, नेपालकी सिम्रन राई र बंगलादेशकी सागोरिका रातो कार्ड पाएर मैदान छाड्न बाध्य भए।
यो हारपछि बंगलादेश दुई खेलबाट ६ अंकसहित शीर्ष स्थानमा उक्लिएको छ। नेपाल र भुटान समान ३ अंकमा छन् भने श्रीलंका अंकविहीन छ। नेपालको उपाधि सम्भावना कायम छ, किनभने डबल राउन्ड रोबिन चरणमा सबै टिम फेरि एकअर्कासँग खेल्नेछन्।
अर्को खेलमा नेपालले श्रीलंकासँग भिड्नेछ भने बंगलादेश भुटानको सामना गर्नेछ।
